FELPEYU: VENTI AÑOS DENDE DIENTRO

Colgamos equí l'artículu qu'escribió Ruma pal  Anuariu de la Música Asturiana d'esti añu (Ámbitu 2011):

FELPEYU: VENTI AÑOS DENDE DIENTRO

Endolcaos pol rock de la nuestra xeneración, mientres echaba a andar na nuestra ciudá lo que depués foi conocío como Xixón-sound, a una parte de la mocedá daquella dionos por averanos a los soníos con raigaños asturianos que yá entamaren unos años enantes. Teníemos les mesmes traces -camiseta de manga llarga embaxo camisa de cuadros, pelo llargo y pendientes- pero envede les guitarres llétriques, el centru de la nuestra música yera la gaita asturiana.

A Igor Medio conocílu na Universidá Llaboral de Xixón. Nun yera difícil coincidir: tábemos en dos aules pegaes no que daquella yera’l bachilleratu esperimental y yá les nuestres aficiones diben paraleles. La primer alcordanza que tengo d’él yera la d’un rapaz de la clas d’al lláu que me chamuscaba dibuxando cómic. Esto fexo qu’entamáremos xuntos l’aventura de dir a Salamanca a la la prueba d’ingresu en Belles Artes. Ígor nun entró esi añu, lo que nun diz muncho d’esti xeitu de facer selecciones.

Llevábemos un tiempu diendo a oyer les jam sesion que facíen nel Trisquel de Xixón y nel Ca Beleño d’Uviéu. Yo entamé a tocar la gaita y el bodhrán mientres qu’Ígor llevaba dellos años estudiando guitarra y anque yera entusiasta del rhythm and blues, el so averamientu al folk ocupába-y cada vez más tiempu. Esi añu subimos a deu al festival de Lorient.

Nel mio primer añu de carrera conocí a los ximielgos ourensanos Cástor y Félix Castro (gaita, flauta y cítara) -que nun fai falta dicir, yá se conocíen dende enantes de nacer-, colos que quedaba un par de díes a la selmana pa dir a pegar gaitazos a la vera’l Tormes. Mientres, Ígor en Xixón fexo un grupu col nuestru collaciu Paco Sandoval y dos futuros felpeyos, Isidro Suárez y Dudu Puente.

VERSIONES Y CHIGRES

A entamos del cursu 1991/92, con Ígor yá na facultá y compartiendo pisu, entamamos a quedar en casa colos “ximis” pa tocar dellos clásicos del folk, sobre too de les cuatro pates nes que ta sofitáu’l nuestru estilu, Planxty y The Bothy Band d’Irlanda, The Tannahill Weavers d’Escocia y los bretones Kornog, amás de los dos discos que tenía Llan de Cubel daquella. Nesa dómina, quedábemos toles tardes pa tocar, atendíemos seique más pa la música que pa la carrera, asina que bien ceo llanzámonos a los chigres. Nel primeru que toquemos, ensin nome tovía -podría definise anguaño como “perrofláuticu”-, dábennnos cerveces de baldre y tanto-y prestó a unu de los veceros, camellu él, que regalonos una piedra costu. Nun fumábemos nengún de los cuatro asina que dímos-yla a un collaciu nuestru qu’acabó enforma mal esa nueche, pero podemos dicir qu’eso foi lo primero que nos pagaron por tocar.

CON NOME Y MICRÓFONOS

Llanzaos yá a facer un repertoriu propiu a medies gallegu y asturianu pa dar conciertos amplificaos, busquemos un nome con alternatives ente les dos nacionalidaes del grupu fuxendo de los topónimos tan avezaos nesa dómina. Trunfó la propuesta asturiana “Felpeyu” por ser un términu despectivu, cortín y fácil de recordar. Toquemos en munchos chigres, facultaes y nun teatru bien curiosín de la Caxa de Salamanca y Soria y grabemos la primer maqueta. Al poco, fiximos una maqueta más curiosa en Llanera con Carlos Redondo de productor y pa la que yá cuntemos con Xel Pereda, compañeru de clas de guitarra d’Ígor, qu’asumía’l puestu de guitarrista reforzando’l buzuki recién llegáu a manes d’Igor. Nesa maqueta “Fuxide Oricios” tópense yá les nuestres señes d’identidá, pieces tradicionales y composiciones basaes en ritmos tradicionales al 50% y lo qu’igual yera más novedá daquella, cantares tradicionales armonizaos deprendíos de los padres d’Ígor, Sonia y Luis, veteranos de les formaciones corales asturianes. Otra característica solliñable no que cinca a los cantares son les influencies del folk-rock americanu y del pop a la hora d’arranchalos. Camiento que Tom Petty, Neil Young o Rem aportáronnos tanto como les influyencies más folquis.

Con esta formación toquemos muncho per Asturies, Galicia y Castiella. Nel branu de 1993 quedemos terceros nun concursu folk en Vilagarcía d’Arousa y grabemos dos temes gallegos nun cedé recopilatoriu, la nuestra primer grabación editada. Siempre nos alcordaremos d’esi conciertu porque mientres tábemos faciendo la prueba soníu pasó per delantre l’escenariu un Porsche ensin techu con un par de chiflaos que llevaben la música (bakalao por supuesto) al altu la lleva y una cabra nel asientu d’atrás, yeren los tiempos de la fariña y el narcoDepor.

D’ASTURIES PA EUROPA

A la fin de 1993, colos hermanos Castro de vuelta pa Ourense, refundamos el grupu n’Asturies con Isidro (flauta) y Xuan Nel Expósito (gaita y curdión) col envís de grabar el nuestru primer discu na primavera’l 1994.

A la fin de la sesión de semeyes pal discu, na plaza’l teatru Bretón de la capital charra dixo Igor: “Vamos pal centru asturianu a armala, van quedar acoyonaos”. A lo que dalguién-y respondió: “Con una gaita en Do, una flauta en Re y un curdión en Si bemol, sí que van quedar acoyonaos…”.

Con esti discu xiremos per tola península col sofitu l’Injuve. Depués del branu entraron Carlos Redondo (guitarra), Elías García (vigulín) y Toño Gómez (vigulín) en cuenta d’Isidro y Xel, formación que caltuvimos tres años. Fiximos la primer visita al intercélticu de Lorient y escomencemos la nuestra llarga rellación con Italia: díbemos tolos branos un par de vegaes a llugares diferentes.

Una nueche, en Pescasseroli (Abruzzos)  depués de tocar, vieno una muyer española a danos la chapa, una de eses persones que namás falen pa oyese a elles mesmes. Carlinos entrugó-y qué facía ellí. Ella dixo:

-Yo era una madrileña joven y guapa que se enamoró de un italiano y se vino aquí a vivir.

-Y sigues siéndolo- dixo Carlos.

-¡Ay!, muchas gracias.- respondió-y la señora.

-¡Madrileña quiero dicir!- Carlinos n’estáu puru, la gota Mistol pa los pesaos.

Tres la grabación de “Tierra” en 1997, entró Fernando Oyágüez al vigulín por Toño Gómez. Fiximos una presentación en condiciones nel teatru Xovellanos de Xixón. Foron los años de facer los grandes festivales del estáu, Ortigueira, Segovia, Moaña, Ancares, Ceutí… y consolidase nel circuitu asturianu. En 1999 entró Lisardo Prieto a tocar el vigulín yá qu’a Elías se-y facía complicao tocar a un tiempu con Felpeyu y Llan de Cubel.

XIRES EXÓTIQUES

De 2000 a 2001 visitemos dos veces Australia en xires de dos meses, onde toquemos nos principales festivales del continente, grabemos directos na televisión y na radio nacional, amás d’editar un discu en directu “Live Overseas”.

Voi afitar equí una historia que depués cuerre per ehí diciéndose que-y pasó a tal grupu o tal otru. Na segunda d’estes xires, camín de Tasmania, el cabrón de Carlos metió-y a Xuan la gorra nel fuelle la gaita (nun ye una lleenda urbana) y asina tuvo tocando un par de selmanes el probe, aguantando a los sos “collacios” dicí-y: “Hoi tocasti cola gorra”.

Tamién tuvimos tocando en Canadá y Portugal amás d’otros festivales dientro l’estáu.

Na seronda’l 2001 entró nel grupu Diego Pangua (flauta y gaita) pasando asina a ser un septetu.

En 2003 estrenemos sellu discográficu propiu “Tierra Discos” col nuestru CD “Yá!”, editáu al mesmu tiempu por “Secret Street” nes antípodes. Fiximos la nuestra tercer xira austral incluyíu’l festival Womad, y presentemos el discu en Xixón, Uviéu y Lorient.

En 2004 y 2005 visitemos Bélxica, Polonia, Dinamarca, Suecia y Líbanu, con presencia tamién nes radios públiques d’esos países y en radio Francia Internacional. Siguimos tocando per Asturies, Llión, Cantabria, Galicia y per tierres tovía vírxenes pa la nuestra música como Euskadi y Catalunya.

L’ALBORADA DE SAN XUAN

Na alborada de San Xuan de 2006, camín d’un conciertu en Catalunya tres la bona acoyida del añu anterior, tuvimos un accidente de tráficu cola furgoneta nel que perdimos a Igor y Carlos. Los que siguimos equí depués del accidente tovía nun salimos del too d’aquel bardial.

Ye mui cruel oyer na voz d’Igor y Carlos la nuestra versión del “Llevántate neña” qu’acaba con: “…mañanina la meyor l’alborada de San Xuan”.

L’homenaxe que-yos rindió la gran familia de la música d’Asturies al añu d’esta gran perda ye ún de los momentos más emotivos de la mio vida.

SIGUIR

Lo único que nos fexo siguir alantre como grupu y col mesmu nome, foi l’aliendu de la xente anónimo, el sofitu de los collacios de la música y sobre manera’l de les families d’esti par de grandes, qu’insistieron y insisten en danos ánimos pa nun parar.

Echemos mano del nuestru collaciu Dudu Puente (baxu y voz) y de Moisés Suárez (guitarra) p’acabar d’arranchar los temes que teníemos a mediu andar pa lo que foi’l nuestru discu “Canteros” de 2008.

Volvimos a la carretera y fiximos, dos años depués, el conciertu de “Calaf” al que nun llegamos en 2006. Italia, Castellón, Madrid…

Dende la seronda de 2008 tenemos a Senén Fernández como cantante y baxista. Con él sumamos Suiza y Escocia a los países visitaos pola banda, amás de festivales importantes, pesllando’l CAT de Barcelona y tocando nel Celtic Conections de Glasgow. Tamos amás metíos nun par de proyectos prestosos: l’espectáculu Xideces cola banda gaites Llacín de Llanes y colos finlandeses Frigg, meciendo música asturiana y finlandesa. En mayu de 2011 punxímos-y música al poema “La Carbonera” pal cedé homenaxe a Manfer de la Llera, editáu pola Conseyería de Cultura lo que ye hasta agora la nuestra última grabación.

VUELTA A LOS CHIGRES

Yá nun tenemos el pelo llargo nin camises grunges pero equí siguimos. Casi nun hai conciertos, les crisis lo primero que recorten ye la cultura y podéis facevos una idea de lo que supón pa un grupu semi-profesional pasar de venti o venticinco conciertos al añu a tres. Nun ye la meyor forma de festexar los venti años. Pero aneciamos como los gochos, sentémonos y falemos de siguir a lo nuestro como podamos, si nun hai conciertos grandes vamos volver a los chigres y si nun pudimos celebrar los venti vamos celebrar los ventiún, como fain los anglosaxones. Tamos nello, temes nuevos pa un discu nuevu, ilusiones nueves… Tovía hai xente que quier venos y nosotros naguamos por subir a un escenariu y dicir: “Bones nueches, somos Felpeyu”.

 Ruma Barbero