LA NUESTRA MÚSICA PEL MUNDU

-Siguimos en contactu colos munchos bonos collacios que fuimos faciendo a lo llargo d'estos 22 años de grupu. Anque la situación económica nos caltién casi paraos, equí en casa y va tiempu que nun vemos a munchos d'ellos, ye bien prestoso ver que siguen alcordándose de Felpeyu y lo que ye más importante, de la música d'Asturies. Digo casi porque siguimos ensayando toles selmanes y trabayando nel nuevu discu qu'esperamos sacar esti añu.

Hai unes selmanes llegónos l'últimu CD de Frigg http://frigg.fi/, un grupu finlandés col que compartimos un proyectu común de directu, que namás pudimos facer en La Felguera en 2010. Namoraos de la música asturiana, lo mesmo que nosotros de la nórdica, grabaron un amiestu de pieces asturianes que deprendieron del discu d'Igor Medio y Lisardo Prieto "Dual" (Tierra Discos 2005) y qu'apaez col mesmu nome "Seronda" nel corte 6 del so discu "Polka V" (Sibelius Academy Folk Music Recordings 2013).

Recomendabilísimu discu.

Portada del discu "Polka V" de Frigg.

L'otru discu que nos llegó esta selmana ye'l de los australianos Señor Cabrales "Aquí".

La xente de Señor Cabrales http://www.senorcabrales.com/ son un grupu de veteranos músicos de folk d'Australia, que conocimos na nuestra primer xira pel so país, en 2000. Ellos tocaben dende siempre música irlandesa y música tradicional australiana (bush music). Conocieron la nuestra música al través de Felpeyu y cuando fuimos pa la segunda xira en 2001, sabíen bien de temes del nuestru repertoriu. Pa la tercer xira que fiximos en 2003, taben montando un grupu de música folk asturiana y tocaben yá temes de Llan de Cubel, Xéliba o N'Arba, amás de los nuestros. Más tarde, col reciente fluxu migratoriu de la nuestra tierra, llegó un gaiteru asturianu a trabayar nesi país y pasó a integrase nel grupu.

Un discu mui recomendable, con mayoría de temes asturianos, anque tamién hai repertoriu gallegu y bretón.

Gracies a los nuestros grandes collacios de Señor Cabrales por caltener la música d'Asturies viva nes antípodes. Gracies por agospiar con vosotros a ún de los nuestros emigrantes col mesmu ciñu col que nos acoyístis a nosotros na vuestra casa siempre que pasamos perellí.

Y gracies fonderes por alcordavos de nosotros y sobre too d'Igor y Carlos na dedicatoria'l vuestru discu.

Portada del discu "Aquí" de Señor Cabrales.

Dedicatoria del discu "Aquí" de Señor Cabrales.