¿QUÉ MÚSICA OYÍEMOS HAI 20 AÑOS?

Semeya de finales de los 70.

Vamos dir cuntando equí la música qu'oyíemos de la qu'entamamos a tocar, los grupos que nos influyeron y marcaron la llínia que depués siguría'l grupu. 
Entamamos por Planxty, esti grupu irlandés que desendolcó'l so trabayu y la so discografía a lo llargo de años 70 y 80. Anque pueda paecenos un grupu irlandés clásicu agora mesmo, foron la xente que siendo mozos decidieron garrar la música tradicional del so país y mete-y una base de cuerda basada nel folk americanu. Tamién cola oreya puesta na Europa del este, foron de los primeros n'adaptar el buzuki a la música "celta".
Nosotros conocíemoslu del programa de Fernando Largo "Gaitas, arpas y zanfonas" (Radio Asturies), d'ehí teníemos grabaos dellos temes en cassette. Tamién conocíemos temes de dellos recopilatorios de música folk y a la fin, la amistá con Isidro Suárez proporcionónos grabaciones de cassette a cassette, de dalgún LP. Ruma mercó dos vinilos d'esti grupu na llibrería Paradiso de Xixón, "After the break" y "Words an music", tamién mercó unu nel festival intercélticu de Lorient 1990, añu nel que subió a déu con Igor, más alantre completó la so collección con otros vinilos mercaos nuna tienda discos de Salamanca, averada a Fonseca, colexu mayor conocíu curiosamente como'l "Colegio de los irlandeses".  Igor foi mercando más alantre los CD's cuando tuvimos per Irlanda tocando música asturiana en Grafton Street, Dublín 1993. Lo que sacábemos tocando pela cai fundíemoslo en discos.
Los buzukis de Donal Lunny, les mandolines d'Andy Irvine, la manera de cantar de Christy Moore y del propiu Irvine, les gaites de Liam O'flynn, pero sobre too'l xeitu de facer los arranchos foron un referente fundamental pa nosotros, una inspiración pa facer lo que facíen elllos pero cola música asturiana. Siempre tuvimos la esperanza de que volviesen a xuntase y poder velos en directo, esto pasó en 2004 y d'equí salió un CD y un DVD.

Tocando'l tema "Good Ship Kangaroo" 2004.

Tuvimos la suerte de compartir escenariu con Andy Irvine en dellos festivales australianos. Nel "Brunswick Folk Festival" de Melbourne, depués de cenar comentó-y a Igor que vaya bien que tocaba'l buzuki, Igor díxo-y: -Deprendílo too de ti.

Dexámosvos equí'l tema búlgaru "Smeceno Horo" que ciarraba'l so discu "After the break" 1979.