¿QUÉ MÚSICA OYÍEMOS HAI 20 AÑOS?(2ª PARTE)

The Bothy Band  "Old Hag You Have Killed Me"

Val, sabemos que nun vamos descubrir nada nuevo nestes entraes nes que tamos falando de los grupos que foron la nuestra mayor influyencia de la qu'entamamos a tocar y qu'igual vos suenen a histories de güelu Cebolleta, pero ¿Préstavos que sigamos cuntando como nos llegaba la música nesa dómina? ye lo que pue tener más gracia.

The Bothy Band, (pa nosotros "La Boci") ¿qué vamos dicir d'esti grupu que nun se dixera?

Anque namás tuvo activu nos años 70 ye'l que marcó'l soníu de la música irlandesa. Como Planxty, garraron les bases del folk americanu p'adaptales a la música irlandesa. Otra vegada más, volvemos atopanos con Donal Lunny al buzuki, Matt Molloy a les flautes y xiblates (qu'años depués entraría nos Chieftains), Kevin Burke (el cherif del vigulín irlandés de la so quinta), l'animal de la gaita irlandesa Paddy Keenan y los hermanos Tríona Ní Dhomhnaill, a la voz y teclaos y Mícheál Ó Dhomhnaill, guitarra y voz (fundadores de formaciones com "Relativity" y la más conocía perequí na dómina'l newage "Nightnoise").

Lo mesmo que Planxty, volvieron a xuntase nos años 2000,  en 2007 nesti casu nun conciertu n'alcordanza Mícheál Ó Dhomhnaill un añu depués de que morriera.

Recopilatoriu de música irlandesa mui setenteru.

La nuestra conocencia de la música de "La Boci" viennos de les mesmes fontes que Planxty, los programes de Fernando Largo y los recopilatorios de música "celta". Pero nel casu d'esti grupu, yera muncho más difícil atopar un discu d'ellos nes tiendes de discos de Xixón, asina qu'eso dába-yos una pátina más mítica tovía. Isidro, flautista del Felpeyu nel primer CD, foi otra vegada más el que nos pasó los discos completos de cassette a cassette, pero pal nuestru friquismu d'esos años abultábanos poco. Fuimos caún pela nuestra cuenta consiguiendo los álbumes, yá fuere en CD o en vinilo. Ún de los primeros qu'algamamos, foi esti qu'apaez equí a la manzorga "Top of the morning". Val, yera un recopilatoriu nel qu'apaecíen más grupos, pero teníes un vinilo con tres temes de "La Boci" y amás na portada salía una gaita irlandesa en primer planu. Esti vinilu vieno na mochila de Ruma nesi viaxe que fixeron a déu él y Igor  al Festival de Lorient 1990. Naide sabe como llegó enteru. Depués d'esto fuimos faciendo pedíos de CD's o vinilos a la casa "Green Linet" de los Estaos Xuníos hasta tenelos toos.

The Bothy Band, "Out Of The Wind, Into the Sun"

La discografía oficial vien a ser esta, creyemos que nun se nos escaez ningunu:

1975  The Bothy Band 

1976  Old Hag You Have Killed Me 

1977  Out Of The Wind, Into the Sun 

1979  After Hours (Live in Paris) 

1983  Best Of The Bothy Band 

1995  The Bothy Band - Live in Concert

Nun tien desperdiciu ningunu de tolos sos discos, anque nosotros somos especialmente forofos del "Out Of The Wind, Into the Sun". Los arranchos de "The Bothy Band", l'usu de les dos cuerdes guitarra - buzuki, les estructures de los sets polo xeneral de tres pieces y les entraes  y salides d'instrumentos, foron una referencia fundamental dende esi momentu na busca'l soníu del nuestru grupu.

Val la pena echar un güeyu a los videos de la televisión irlandesa qu'hai subíos al Youtube.