CONCIERTU NA SELMANA LES LLETRES

El prósimu miércoles 4 de mayu, Felpeyu vamos tocar nel "Conciertu 13 x Mánfer" nel Teatru Nuevu de La Felguera a les 20.00 h. Esti ye un conciertu nel que va lleváse al directu'l discu homenaxe al poeta llangreanu Manfer de la Llera al que ta dedicada esta selmana de les lletres asturianes. Nel nuestru casu vamos tocar entre otros temes el cantar "La Carbonera" con música de Felpeyu y lletra adaptada del so poema del mesmu nome. Ye'l primer cantar que facemos de temática minera y prestónos porque nesti casu fala de  la figura de la muyer na mina, la gran escaecida nesti xéneru. Podéis ver equí l'adaptación que ficimos del poema.

LA CARBONERA
¿Cuántos años lleves yá
nesti pozu, compañera,
sentada’n to duru tronu
debaxo esa vagoneta,
cola to diestra emburriando
el carbón p’hacia la cesta?

Col to rostru atristayáu,
el pañuelu so la testa,
les tos manes llaceriaes
y en cada pie so madreña
como asturiana que yes...
heroína d’escombrera.

Equí toi de nueu a vete.
¿Tás perende, carbonera?
Yes la muyer llaboriosa
de tola cuenca minera.

¿Cómo hai quién propuxere
retirate, compañera?
¿Ye qué daquién s’avergoña
d’asoleyar to silueta
imaxen del nuestru pueblu
y de la muyer minera?...

Tú ñacisti cuando’l pozu
y esti contigo ñaciera,
nun tengas miéu que t’esplacen
que’l pueblu tá a la to vera.
Teniendo’l pueblu al to lláu,
nun tengas miéu, ¡carbonera!

PIE

Amás de Felpeyu, tarán esa nueche Alfredo González, Hermanos Valle Roso, Mario Fueyo (Dark la eMe), Renacencia, Toli Morilla, Xera, Silvino Torre y alumnáu y docentes del IES Cuenca del Nalón.